Num 27 | BNP | STEP | E Mala, e Noa, e Hoglah, e Milka, e Tirsa, e huriki a ngatavine e tune Selopehad, ri deke. E Selopehad e tune e Heper, e Heper e tune Gilead, e Gilead e tune Makir, e Makir e tune Manase, e Manase e tune Iosep.

c 27:17 1Ki 22:17; Ese 34:5; Mat 9:36; Mrk 6:34

Numbers 27

E Huriki e Tune Selopehad Ngatavine

1 E Mala, e Noa, e Hoglah, e Milka, e Tirsa, e huriki a ngatavine e tune Selopehad, ri deke. E Selopehad e tune e Heper, e Heper e tune Gilead, e Gilead e tune Makir, e Makir e tune Manase, e Manase e tune Iosep. 2 Na parava tara a ngatavine nga ri vano ri pesi na matana Kape na Vaponga, na matane Moses, e Eleasar a prister, ne huriki a matakari, ne huriki a bakovi a ngatavine, ri ta maea, 3 “E tamane mia i mate na tabeke i ngeki, pali i uka ma i turana e huriki a tara ne Kora ra ri longotaro a nitane BAKOVI DAGI. Ia kunana i rata a naro hale, i mate. Pali i uka e tuna bakovi. 4 I muholi ngi i uka e tuna ga bakovi ge bole a murina, pali i navai a rane tamane mia ge velu tavula ne hita e huriki a Israel? I mavonga o habi mia ranga tabekena malala, na kabu ne tamane mia.”

5 Lakea e Moses i bole lakea ne BAKOVI DAGI a nitane ria. 6 Lakea e BAKOVI DAGI i takia, i ta maea, 7 ^a“A nitane huriki e tune Selopehad i kamumu. O habi ne ria ranga tabekena malala na kabu ne tamane ria, ri gi tahoka.

8 “O taki e huriki a Israel o ta maea, ‘A bakovi ge uka e tuna bakovi, i tahoka kunana e tuna ngatavine, muri i mate, e huriki e tuna ngatavine ri gi bole a maki vona. 9 Ge uka e tuna ngatavine, e huriki e turana ri gi bole a maki vona. 10 Ge uka e turana, e huriki e turane tamana ri gi bole a maki vona. 11 Ge uka e turane tamana, e tune turane tamana ge bole a maki vona. E huriki a Israel lobo ri gi ramaia a vinara iea.’”

A Vure i Vulakia e Iosua Ge Bole a Murine Moses

12 ^bE BAKOVI DAGI i takia e Moses i ta maea, “O sike na lolo e Abarim, o tuvaia a malala ta ga habia ne huriki a Israel. 13 O matai taroa muri bara o mate ke, i manga e turamu e Aron i mate. 14 A vuhuna muru longotaro a nitagu na tabeke i ngeki ne Sin. Na tahuna e huriki a bakovi a ngatavine ri tapuhaki ne nau na naru e Meriba, o marikoi ni vakasiri a nitora dagi nau ne ria.” Ra lomu e Meriba i tabuli o Kades na tabeke i ngeki ne Sin.

15 Lakea e Moses i takia e BAKOVI DAGI i ta maea, 16 “O Vure, ioe e BAKOVI DAGI, ioe kunana a vuhuna a nimahuri ne huriki lobo. A nana ioe go vulakia tara bakovi ge matakari e huriki, 17 ^cge tuhori ria ri gi made kamumu, ge muga ria na vabinga. Lakea e huriki a tara vomu i uka ma ri gi laho viliha lae, ri gi manga a maka sipsip ri uka a matakari ne ria.”

18 ^dLakea e BAKOVI DAGI i takia e Moses, “O vulakia e Iosua e tune Nun, a vuhuna a hanugu i tabuli vona, o ru langa a limamu vona. 19 O takia e Iosua ge pesi na matane Eleasar a prister, na matane huriki a Israel lobo. O vakalongo ria vona e Iosua i kuloi ioe, o habia vona pali a leho vomu. 20 O habi vona ranga nitora vomu, lakea e huriki a Israel ri gi longototoa. 21 ^ePali e Iosua ge lakea ne Eleasar a prister ge lohoka kamumu vona a ningaru nau. E Eleasar ge bolea a kedo kiroko e Urim, ^{▼▼(27:21)A ‘Urim’ a kedo kiroko a prister dagi i tahonia pololilo na bagetua vona ge bole a lohokanga vona ne BAKOVI DAGI.} ge bole a lohokanga na ningaru nau. Muri ge vakalongo e Iosua turane huriki a bakovi a ngatavine na maki lobo ri gi rata.”

22 Lakea e Moses i rata a maki e BAKOVI DAGI i taki ia vona ge rata. I bole vilia e Iosua, i vakapesia tabukoi na matane Eleasar a prister, na matane huriki. 23 ^gLakea e Moses i ru langa a limana na gine Iosua i taki ria ne Iosua ge bole a murina. E Moses i rata lobo a maki e BAKOVI DAGI i ngaru ge rata.